اهـــداء

لكل البـاحثـين عن ذكـرى لم تعـبر يوما خـط النـور .. لكل من عانــى يوما من اثـار الطـريق .. لكل من حاول دخول النفــق باحثا عن لمحة ضياء فى نهايتــه و اختلطت عليه الدروب فلا هو وجد الضوء و لا هو استطاع الخــروج .. اهداء لكل البــشر .. لكل الظــلال ..

احمد

الخميس، 28 يونيو 2012

الحب كما رواه لى "عم امير " !







" يا  بشمهندس  احمد  ..  اسمعنى  و  مش  هتندم  ! ..  "




انطلقت الكلمات  بحماس  غير  مسبوق  على  لسان  "  عم  أمير   "   وهو  يطالبنى  بالانصات  قليلا  لحوار  بداخله  على  وشك  الانفجار  ..  "  عم   امير  "   لمن  لا  يعرفه   هو   "  مقاول  خشب  "  كبير  السن   يعمل  معى  .. يرتدى  نظارة  طبية  انيقة  غير  متناسقة  مع  مجال  عملنا  ..  غير  متعلم  و  لكنه  يحمل  اطنانا  هائلة  من   الثقافة  و  هذا   مااا   يجعل  حوارى  معه  عبارة  عن  جدل مستمر  ..  اعشق  الحوار  معه  لانه  يملك  "  وجهه  نظر  "   مبنية  على  الخبرة  ..  خبرة  حياتية  اعمق  كثيرا  من  الاف  الكتب  و  النظريات  العقيمة  ..  هذا   رجل  اعترك  الحياة  بكل  مافيها  ..  تستطيع   بسهولة  ان   تلمح  كل  اثار  الزمن   المحفورة  على  يديه  و شقوق  الوجه  العميقة  ..  عندما  يتحدث  عن  فلسفاته  فى   الحياة   ربما  يختلط   عليك  الامر  فتتصور  ان  "  ارسطو  "  قد  بعثت  فيه   الحياة  من  جديد   ..  




المهم  ..  اكمل   بالعامية   لانها  انسب   فى  الموضوع  دا  ...  فى  يوم  صيفى  حار   كنت  فى  المكتب  فى  الشغل  اتصلت   ب "  عم  امير  "  استدعيه   من   الموقع  عشان  هاصرف  له  مستخلص  ..  طبعا  مكانش  مصدق  ان   اخيرا   هياخد  فلوس  و  انه   مش  بيشتغل  ببلاش ..  دقايق  و  كان  قدامى   فى  المكتب ..  طمنته  انى  هصرفله  مبلغ  كويس  .. مش  بس  كده  ..  لا  دا  كمان  هيشرب  كوباية  الشاى  اللى  مستنية    ع  المكتب  بعد  ما  سابها  المهندس  زميلى  وحيدة  ...  طبعا  مافيش  موود   فى  العالم  بالنسباله  دلوقتى  ممكن   يبقى  احسن  و  اروع  من  كده  ..  الموود  دا  تلقائيا    بيخليه   يجيب  كل   اللى  عنده  ..  و  فى  اليوم  دا   بالذات   هو  كان  محتاج  يتكلم  ..  و  انا   مكانش    عندى  مانع  اسمع  ..   بس  كنا   محتاجين  طرف  خيط   نبدأ  بيه   الحوار  ..  فى  الغالب  حوارتنا  كلها   مع   بعض  بتكون  عامة  ..  تبدأ  باسباب  انهيار  الاتحاد  السوفيتى  و  سقوط  الماركسية  ..  و  تنتهى  بخلاف   حاد  حول   اهمية  القبلة  الفرنسية   لحياة  مستقرة  و  صحية  ..  ربما    اهمية  "  تدليع  "   الست  لانها  مخلوق  بيحب  الدلع !!  ..  احم  احم  .. المهم  ..  طرف   الخيط  بتاع  الحوار  فرض  نفسه  لما  دخلت  "   عميلة  "    المكتب   بتسأل  على   شقق  عندنا  فى  الشركة ..  انثى  من  الطراز   الصاروخى  هاى جيت  متعدد  المدى   عابر  للقارات ..  لو  كان   مكتبنا   فى  شارع  صلاح  سالم   و   عدت  البنت  دى  من  قدام  قصر  البارون  اعتقد  ان  البارون  بنفسه  كان  هيقوم  ياخد  كورس  صعيدى  و  يصررررخ  "  البت  دى  حلووووووة  جوووووى   يابوووووى  !! "  و  بعدها  يرجع  ينااام  بسلااام   ..    المهم  لاحظت  طبعا  نظرات  "  عم  امير  "    للبنت  ..  و  عنيه   اللى  طلعت  بره  عدسات  النضارة  بمسافة  5 سم   ..   سألته  باستنكار  ..  ياراجل  عيب  علييك   ..  دا  انت  راجل  قديييم  و  متجووز   و  اعرف  انك  بتحب  مراتك  ..  دخل   عنيك  دى  جوه  النضاره  مش  كده !!  ..  ضحك  ضحكة  طوووويلة   ..   رد  عليا  بسؤال  ..  "  طب  دا  ايه  علاقته   بالحب  يا  بشمهندس احمد ؟  "  ..  




اااه  ..  كده  بقى  بدأ   الحوار  ..  لقطت   منه  طرف   الخيط  ..  رديت ...  "   لا  طبعا  ليه  علاقة  يا راجل  يا  ملتوى  " ..  "  ازاى  تبقى  بتحب  ست  و   تبص   لواحدة  تانى  و  تتمناها  ؟؟!!  "




"  يا  بشمهندس  احمد  اسمعنى  و  مش  هتندم " !  ..


"  احكى  يا عمونا  انا  هسمعك  لللاخر ! "   ..




بص  يا  هندسة ..  مافيش  حد  فى  الدنيا  هيكلمك  عن  الحب  زىى  ..  انا  اتجوزت  بعد  قصة  حب  مدتها  15   سنة  ..  و  ابنى   "  سيد  "  طلع  و  كرر  حكايتى  ..  سيد  دا    كاان  هيطردنا  من  البلد   بسبب  حوار  الحب  بتاعه  ..  فضل   يحب  بنت  7  سنين ...  و  اتقدملها  100  مرة  ..  و  اهلها  كل  مرة  يرفضوه  ..  و قال  لاهلها  انا  لو  متجوزتش  البنت  برضاكم  هتجوزها  غصب  عنكم  ..    اهلها  حبسوها  .. و هددوا  الواد  ..  و كانوا  هيجوزا  البنت  بالعافيه  لولا  حاولت  تتنتحر  و  انقذوها  فى  المستشفى   فى  اخر  لحظة  ..  و  فضلت  المشاكل  طول  فترة  7  سنين  ..  لغاية  ما  قرروا   يهربوا  مع  بعض !  ..  و  فعلا  ..  اتفق  الولد  و  البنت  مع  بعض   و  هربوا   على   مصر   ..  و   البلد  اتقلبت  عليهم   و   كنت   هاروح  فى  داهية  انا  و  عيلتى  ..  و  اتدخل   اعضاء  مجلس    شعب   فى  الحوار  عشان  يحلوه  و و و  ..




"  عارف  يا  بشمهندس   احمد  "  ؟!


ممممممم


سيد  جه   مرة  و  قالى   انا   لو  ما   اتجوزتش   البنت   دى  ..همووت  ..  عارف  ؟؟    انا  حسيت  ان   كلامه  دا   بجد  مش  مبالغة  فى  اللحظة   دى  ..  كان   بيحبها  بجد  ..  بيحبها   اكتر  من    اكتر  اى  حاجة  تتخيلها  ..


المهم  ..  عرفنا   نوصل  للواد  و  البت  و  اقنعناهم  يرجعوا  ..  و  هنجوزهم  لبعض  لان  مافيش  حل  تانى  ..  و  فعلا  اتجوزوا  ...  و  هما    بقالهم   سنتين  دلوقتى   ..  




طبعا   اانا  كأحمد  انبسطت  ..  جميل  ان   علاقة  حب  بالشكل  دا   تتوج  فى  النهاية   بالحلم  انهم   يكونوا  مع  بعض  ..  تخيلت  شكل  حياتهم   ايه   مع  بعض  دلوقتى  ..  مشاهد  من   مسلسل  مهند  و  نور   او  كريم  و  فاطمة  و   الرومانسية  المفرطة  و  ...




- عارف  يا هندسة  ؟؟؟    
قاطعنى   صوت   عم  امير  و  قطع  عنى  البث  الرومانسى  


 - نعم   يا  معلم   امير  ؟؟




-  انا  لما  باروح   عندهم  البيت  دلوقتى   ..  بلاقيه   بيضربها   بالشبشب  !!!




-  (  ايموشن  ذهول  )  و  حواجبى  طلعت  فوق  دماغى  !!   ..  مين    اللى  بيضرب  مين  ؟؟  سيد   بيضرب  مراته  ؟!!  ..  البنت   الللى  كان   بيحبها  !!   اللى   عمل  عشانها  كل  دا  !!!!!!




-  ايوا   ..  و  كل   اسبوع   مزعلها  و  رايحة  لبيت  ابوها  !!!






-   انت  طبعا   بتهزر  !!




- و  الله   العظيم  بتكلم  جد  ..  و   حياتهم   كلها  زعيق  و  قرف  !!




-  امال   ايه  اللى  كان  بينهم  طول  7  سنين  ؟؟!!






-    بص   يا  هندسة  ..  الناس   بتتصور   ان   الحب  دا  حاجة  ثابتة   ما بتتغيرش  ..  و  انك  طالما   حبيت  حد   يبقى   حياتك  وقفت  عليه  ...  لا  يا  باشا  ..  انت   بتحب  ..  و   تتجوز  اللى  بتحبه  ..  و   شوية  شوية  شوق  الحب  دا   بيهدى  ..   و  يتحول لحجات  تانى  ..  حجات   احسن  او  اسوأ   ...  دا  بيعتمد  عليك  انت  و  هى  ..   لو  قررتوا   ان  اللى  بينكم  قبل  الجواز  دا  احسن  شىء  ممكن  تحسوه   لبعض و  ان  مش   ممكن  يكون  فيه  اكتر  من  كده ..  يبقى  حياتكم  مع  بعض  هتكون  فى  النازل ..  لو  قررتوا   العكس  ..  يبقى  هاتكتشفوا  ان  الحب  اللى  كان   قبل  الجواز  دا  لعب  عيال  ..  و  ان   اللى  انتوا  فيه  دلوقتى  ..   اهم  و اغلى  كتير  ..  من  كلمة  بحبك ..  !!!!!




ارجع  للفصحى  بقى ..


انتهى  "  عم  امير  "  من  محاضرته   الاستثنائية  ..  احتاج  قليلا  من  الوقت  لكى  اهدأ  من  وقع  كلماته  ..  مازال  يمارس  هوايته  العريقة  برشف  الشاى  الساخن  بهذا  الصوت  الجهورى  ..  انظر  له بهدوء   ..  اتأمل  فى   المكتب  ..  اللوحات  ..  ثمة  جرس  هاتف  فى  مكان  ما   لكنى   لا  اهتم  ..  اعاود  النظر  للسيدة  الصاروخية   ..  لماذا   لا   تبدوا   لى    فاتنة  كما  كانت  من  دقائق  ؟؟؟ .......










الجزء  التانى  من  الحوار  هيكون  مع  "  سيد  "   نفسه   ..  ابن  عم  امير ..  و  اللى  قابلته  بعدها   بفترة !!








احمد

هناك 9 تعليقات:

  1. اشكررررررك تنسيييم جداا جداااا .. و تدويناتك راااائعة

    ردحذف
  2. روعه جدا حلوة خالص قصة صاروخيه بحته

    ردحذف
    الردود
    1. مههههههههههههههههه طب شكرا اصلا بقى ;)

      حذف
  3. "دا بيعتمد عليك انت و هى" .... جميييله جـــــــــدااا
    يسلم فمك ياعم امير .... اسلوب رائع على فكره وممتع
    ربنا يوفقك ^_^

    ردحذف
    الردود
    1. و الله انا بقيت اعز عم امير اكتر من الاول كتيير لانه كان السبب فى وجودكم و تشريفكم ليااا .. اشكرك على كلماتك .. :)

      حذف
  4. تحححححححفه بجد ..
    مُيارك تأهلك للتصفيات الأولى من كتاب المية تدوينة ..
    بتمنالك التوفيق سي أحمد :))

    ردحذف
  5. سؤال من فضلك ..
    الجزء التاني من الجوار اللي حصل مع سيد .. نزل ولا لسه .. ؟

    ردحذف

  6. رائع
    عنده حق
    احنا بتصرفاتنا اللى بنموت الحب
    مبروك
    سعيدة انى اتعرفت على مدونتك

    ردحذف